నరసరావు పేట, నవంబరు 01(పల్నాడు అప్డేట్స్) నరసరావు పేట పోస్ట్ మెట్రిక్ గిరిజన బాలికల వసతి గృహంలో విద్యార్థినులకు కంప్యూటర్ కోర్సులు నేర్పించాలని జిల్లా కలెక్టర్ కృతిక శుక్లా అధికారులను ఆదేశించారు. వసతితో పాటూ పోటీ ప్రపంచంలో ఉద్యోగాలు పొందేలా నైపుణ్య శిక్షణ అందించాలన్నారు. 15 రోజుల జన్ జాతీయ గౌరవ్ దివస్ వేడుకల నేపథ్యంలో స్థానిక బాలికల వసతి గృహాన్ని జిల్లా కలెక్టర్ సందర్శించారు. వసతి గృహంలో ఆర్వో ప్లాంటు, మెస్, వంటగదిని పరిశీలించారు. ఈ సందర్భంగా వసతి గృహంలో కొబ్బరి, వేప మొక్కలు నాటారు. స్వాతంత్ర్య సమరయోధుడు, గిరిజన హక్కుల పోరాట వీరుడు బిర్సా ముండా స్మృతిలో నిర్వహించే 15 రోజుల వేడుకలలో వ్యాస రచన, వక్తృత్వ పోటీల్లో పాల్గొనాలని పిలుపునిచ్చారు. బాల్య వివాహాలు చేసుకోకుండా, బాగా చదువుకుని ఉన్నత స్థానాలకు చేరుకోవాలన్నారు. ఈ కార్యక్రమంలో జిల్లా గిరిజన సంక్షేమ అధికారి దాసరి అమర్ సుబ్బయ్య, మున్సిపల్ కమిషనర్ జస్వంత్ రావు తదితరులు పాల్గొన్నారు.
